ఈ వ్యూహాలతోనే.. చినజీయర్‌తో జగన్ భేటీ?

ఏపీ ప్రతిపక్షనేత వైస్ జగన్మోహన్ రెడ్డి మంగళవారం చినజీయర్ స్వామిని కలిసి ఆశీస్సులు పొందారు. బెంగళూరు నుంచి హైదరాబాద్ వచ్చిన జగన్.. నేరుగా శంషాబాద్ సమీపంలోని చిన జీయర్ స్వామి ఆశ్రమానికి వెళ్లారు. అక్కడ జగన్‌కు స్వయంగా స్వాగతం పలికిన స్వామి.. ఆయన్ను ఆశీర్వదించారు. ఆశ్రమానికి వెళ్లి మరీ జగన్ చినజీయర్‌ను కలవడానికి కారణం ఏంటనే చర్చ రాజకీయ వర్గాల్లో నడుస్తోంది. కేవలం ఆశ్వీరాదం కోసమే జగన్ అక్కడికి వెళ్లాడని వైసీపీ వర్గాలు చెబుతున్నారు. పాదయాత్ర ప్రారంభానికి ముందు ఆశీస్సులు పొందడానికే ఆయన్ను కలిశానని జగన్ ట్వీట్ చేశారు. కానీ ఈ భేటీ వెనుక వేరే కారణాలున్నాయని రాజకీయ విశ్లేషకులు భావిస్తున్నారు.

గత కొద్దికాలంగా రాజకీయాలను గమనిస్తున్నట్లయితే.. బీజేపీకి దగ్గరయ్యేందుకు వైసీపీ ప్రయత్నిస్తోంది. రాష్ట్రపతి, ఉపరాష్ట్రపతి ఎన్నికల్లో జగన్ ఎన్డీయే అభ్యర్థికి మద్దతునిచ్చారు. రాష్ట్రపతి లాంటి అత్యున్నత పదవికి ఎన్నికలు లేకుండా.. ఏకగ్రీవమైతేనే బాగుంటుందని కూడా జగన్ మాట్లాడారు. ఇక తాజాగా చినజీయర్‌తో భేటీ కూడా బీజేపీకి దగ్గర కావడంలోనే భాగమని రాజకీయ విశ్లేషకులు భావిస్తున్నారు.

అదీగాక జగన్‌పై క్రిస్టియన్ అనే ముద్ర ఉంది. గత ఎన్నికల్లో ఆయన పార్టీ కొద్దిలో అధికారానికి దూరమైంది. దీనికి ఆ ముద్ర కూడా ఎంతో కొంత కారణం. దీన్ని తొలగించుకోవడానికి జగన్ ఇలా స్వామిజీలను కలవడం, యాగాలు చేయడం లాంటి కార్యక్రమాలు చేస్తున్నాడని మరి కొందరు భావిస్తున్నారు. రాజకీయ నాయకుల గమ్యం అధికార పీఠం. దాన్ని చేరుకోవడానికి అందుబాటులో ఉన్న ఏ మార్గాన్నీ వారు వదులుకోరు. జగన్ కూడా ఇందుకు మినహాయింపు కాదు.